بما اني انحرمت من نعمة ان يكون عندي اخوات بنات ,
سأتناول بعض أفكاري في هذه المسألة , أحياناً نتناقش انا و الوالد و الوالدة في هذا الموضوع ,
و كل مره يتكرر نفس النقاش و نفس الموقف , هم كانوا يتمنوا يكونوا عندهم بنت على الأقل ,
و انا ارى أنه ذلك يهدد أمن المستعمرة الذكورية التي بنيتها منذ 19 عاماً ,
انا شايف انه كده كل حاجه كويسه و كله ماشي تمام ,
كانت هتعمل ايه البنت ؟ , أكيد ليها فوائد أكيد طبعاً زي ما الولد ليه فوائد ,
أخبرني صديق لي في مره من المرات أن نعمة وجود الأخوات هى نعمة عظيمة لا يقدرها الا من يفقدها ,
طب يا سيدي مانا أفقدها اهوه , ايه اللي حصل في الكون يعني ؟
, ولا زعلان ولا حاجه , كله تمام , نرجع للنقاش الذي دار بيني و بين الوالد . .
دائماً ما يقال (أصحاب العقول في راحة) ,
و انا أرى انه يجب ان نقول أيضاً (آباء الأولاد في راحة)
و أقصد هنا راحة البال لأن المجهود المبذول من أجل الأبناء سواء بنات او أولاد واحد , و
خلال النقاش بيني و بين الوالد و الوالدة سألتهم إن كانوا قد تمنوا من قبل أن يكون لديهم إبنة , فجاوبوا بالإيجاب ,
فوضحت لهم مدى نعمة أن يكون الابناء جميعهم من الذكور و ما في ذلك من راحة للبال و إطمئنان ,
فقالوا لي إن اللي يعرف يربي بناته كويس مش بيقلق عليهم , بس انا مش شايف كده ,
ازاي الكلام ده بس يا راجل يا طيب , ازاي الكلام ده يا حاجة ,
القلق موجود و حتى لو كانت البنت شيخه في الأزهر ,
القلق مش قلق من البنت نفسها طالما متربيه , القلق بيكون عليها ,
لكن الولد بيكون القلق عليه أكيد أقل و محدش يحاول يراوغ معايا في المسألة دي ,
و لكن واضح ان جميع محاولاتي باءت بالفشل , فما زالوا مصرين على رأيهم , تلك بعض دوافعي . .
1 - انا دلوقتي عندي اخين , يعني اولاد بس , يوم ما واحد فيهم يعمل حاجه متعجبنيش ممكن أمسكه اعجنه ,
ممكن احطه في علبة تونه لو حبيت ,
لكن لو عندي اخت بنت ممكن اطق بدون ما ألمسها ,
يعني البنت تتنطط و تطلع لسانها و انا مش قادر اشفي غليلي .
2 - زي ما قولت قبل كده , الولد ممكن يقول لأبوه انه رايح النادي و هيرجع بليل ,
و يروح و يجي على الساعه 10 او 11 بليل ,
لكن لو الولد ده كان بنت كان أبوها هيقعد يسأل عليها كل شويه , و هيفضل مشغول عليها أكثر من الولد بكتير .
3 - الولد بيشيل اسم أبوه , البنت مش بتشيل حاجه , او اقولك , ممكن تشيل الغسيل ههههه .
4 - البنت مسؤولية ووجع دماغ , لكن الولد ممكن تستخدم معاه نظام خلف و ارمي ,
لا مش اوي كده , بس أكيد تربيته أسهل لو هو مؤدب يعني .
5 - لو في بنت في البيت انا مش هاخد راحتي زي لو كل اللي موجودين ولاد .
6 - البنت مش هتقدر تمنع حد انه يكلمها , ولو انت بقى راجل حمش ولع في نفسك ,
لكن الولد لو اتكلم ولا صرخ ولا قلع هدومه حتى قدام الناس يبقى طز فيه ,
يعني ايه اللي هيحصل يعني , ده ولد يا جماعه ,
يعني انا مسألة الغيره دي مشعرتش بيها كتير قبل كده لإن معنديش اخوات .
طبعاً مع الإعتذار لكافة الجهات المذكورة أعلاه . . نيجي بقى لمميزات البنات . .
1 - البنت لو دمها خفيف بتبقى حاجه حلوه جداً ,
يعني لو كان عندي اخت دمها خفيف كنت هبقى مبسوط , ولو كان دمها ثقيل كان ممكن اولع فيها .
2 - البنت بتكون ذكية و شاطرة في الدراسة في كثير من الأحيان ,
يعني بيكون البنات المتفوقات عادة اكتر من الأولاد .
3 - البنت عادة بتكون متعاونة و بتساعد الجميع .
4 - لولا البنات مكانش هيبقى في أولاد , يعني هم المصدر .
5 - مع اني مجربتش , بس أكيد لما يكون الولد عنده أخت هيكون في إختلاف في شخصيته نفسها ,
طبعاً إختلاف للأحسن .
6 - البنت لو متربيه كويس و اخلاقها عالية هينعكس ده على اولادها في المستقبل لما تبقى أم ,
يعني دورها التربوي أكبر من دور الأب .
و في النهاية , انا لو عندي في المستقبل ان شاء الله أولاد , هتمنى يكون فيهم بنت واحده على الأقل , يللا زي بعضه !